Bann filozof dizon bann rézonèr i panss La franss lé konmsa ébann franssé lé inkapab antann azot.I fo dir si li fé konm lo Bayeroux, son poi lé o fé ,sa lé sir pars si li vé ankor tir son prozé d’zékonomi dsi bann travayèr, dsi bann shomèr, bann rotrété, bann malade épi bann zanfan lékol lé sir li pass arpa lontan dann in poss konmsa.

Pars si mi antan bien son bann, mi diré zot i vé ménaz bann kapitaliss, bann rish donk sak néna larzan an poundyak é zot i vé tir dsi sak na pwin lo moiyin pou moiyéné mi oi son ka la pa in kado é anplis avèk in lam dané i apèl Macron é son lidéolozi d’rapyang bin mi di é mi rodi mèm si li tienbo zèrb-konm kan nou téi zoué la krosh lontan- li na poi pou lontan.

Astèr mi parl banna mé o fète sa i intérèss pa mwin tro, sak i intérèss anou sé nou.Banna i antan pa ?ok ! ébin nou ? Ni gingn pa kozé nou ? biensir nou sé in pèp arkanssyèl, biensir nou néna plizyèr zidéolozi.Sa i anpès anou kozé sa ? bann rolijyon La Rényon i gingn assiz inn koté d’lote épi diskité é nou avèk noute bann problèm ni gingn pa diskité konm noute parti i propoz ;

Mwin la antann demoune dan lo parti apré dir :alon réinir, alon diskité,alon tonm dakor dsi in prozé pou l’avnir..Mi oi pa kossa i anpèsh anou fèr in n,’afèr konmsa.. Ni konstate banna i antan pa :ok ! Bin nou alor, ni gingn pa antann ossi ?

A bon antandèr salu !

Justin