Matant Zélida la ékrir Justin :

Mon shèr nové, mon spès salté, rouj-de-fon dovan l’étèrnité, figir aou mi sort gard dsi internet in l’évalyasion dsi la kapasité bann marmaye zordi par raport z’ot kapasité néna trant z’ané.ébin, figir aou mon nové, dsi la késtyonn kapasité pou lir, pou ékrir, pou kalkilé, marmaye koméla la bien kilé par raport bann marmaye néna trant z’ané pétète in pé moins. Dsi la késtyonn l’ortiograf i parétré mèm zot la pèrd dé z’ané. An aryèr tout ! La i pé mèm pa dir zot la rès an plas mon névé, zot la arkilé é mi pans bann rouj lé pou kékshoz la-dan lo soidizan démokrasi. Dé z’ané d’rotar ! Pran sa pou toué mon nové !

Justin la fé pou répons :

Mon vyé matant k’i koz touzour la boush rouvèrf in kozman konmsa i étone pa moin dé out par. Ou lé konm bann vyé réaksyonèr, l’apré di toultan bann marmaye i vien plizanpli kouyon, plizanpli pa kapab align dé mo d’fransé, fé in règ dé troi, sansa konète in tab miltiplikasyon par sète, par uit sansa par nèf.

Matant lo privilèz in moun i viv lontan sé kan li pé fé la konparézon rant li a tèl laz, tèl laz, é son bann zanfan, pti zanfan, nové, pti nové.A biensir pou konète la kouyonad bann vèrb irégilyé, bann l’ortograf antortiyé, bann partaz égal sansa inégal, règ dé troi é patati é patat, nou té pli for, sa lé sir. Mi pé mèm di nou lété pli for dann tout sak i ansèrv arien ditou.

Nou téi koné vous faites ! nou té i koné vous dites ! Pétète koméla désèrtin marmaye i di vous faisez, é vou dizé. Mé lo pli inpotan sé kan ou i ékri bien manyèr d’lontan, sansa si ou lé kapab dir épi fèr ? Moin pèrsonèl mi pans lo pli inportan sé kan ou lé kapab dir é kan ou lé kapab fèr. Plito ké bien arondi la batarde pou ékri n n’afèr konm bann vyé shnok l’akadémi la di i fo ékri. Pars konm mi di souvan dé foi, banna lé konpliké, épli kon ké pliké kroiyé moi. Alé ! Tok ! Pran sa pou ou !