Dèrnyé zélékssion laba dann Maurice in koalission la ranporté é lo lanssien majorité la pèrde. Dsi lo poinnvizé bannzil Chagos lo nouvo majorité lil Maurice la fé konète l’avé dé poin téi i kontante pa zot. Sé pou sa zot la fé konète gouvèrnman GB zot téi vé diskite déssèrtin poin lakor lo 3 oktob.

Nou la fine anparl déssèrtin poin téi kontante pa bann chagossien épi d’ote téi kontante pa lo nouvo gouvèrnman lil Maurice. Momandoné, déssèrtin téi kroi ziska bann négossiassion rante lo dë gouvèrnman téi sava kapoté.

Plizyèr somenn la passé é yèr soir mwin la rogarde in pé laktyalité dann MBC pou aprann lé dé gouvèrnman la désside ronégossyé é lo chef la délégassion mauricienne — lo miniss La Zistiss, téi doi ropran laviyon pou alé laba dann london pou ropran bann négossiassion.

Mi panss nouvèl mi done azot la i doi kontante in pé bann chagossien konm bann patriyote maurissien, épi toute bann siportèr la koz Chagos avèk léspoir i trouv in bon solission i fini par in solission d’pé dann losséan indien.

A bon antandèr salu !

Justin