Bann léktèr nout zournal lé déza o kouran sète afèr-la. An dé mo ni pé di : Kan Madagascar la vni indépandan, la Frans la gard pou èl bannzil zépars.an parmi néna Juan de Nova, Bassas de India, Europa… Bann tizil mé alé savoir pou kosa La Frans la fé sak èl la fé, konm ki diré in dékolonizasyon pa anshévé.
Sa i di pa zot arien sa ? Sa i rapèl pa zot gran désizyon La kour internayonal zistis La Haye la prann na poin si tèlman lontan par raport bannzil chagos, mé sète-la lété an plis doublé par in krime kont l’imanité avèk léspilsyon bann zabitan lé Chagos.

In pti romark kant mèm dsi lo zéni fransé. Zéni ? Mi pans i fo ète zényal pou pa konprann bannzil la lé instalé dsi bann nap pétrol avèk lo gaz é pou oir arienk bann kaka zoizo néna dann lil Juan de nova. A ! Zéni fransé, mi trouv ou lé top ; konm ou lé top pou bann rosours minyèr Madagaskar, sansa ankor bann nap lo gaz i pé an avoir dann kanal Mozanbik kosté sanm bannzil komor, Mayote ansanm…
Astèr, ni fèrm lo pârantèz é ni rovir dsi lo sizé i intérèss anou zordi : i diré pou bannzil zépars lé shoz i avans in pé. Prézidan Malgash la parti palé l’élizé épiz apré diskisyon sanm lo prézidan fransé lo dé péi la mète an plas in komisyon ad-hok pou trouv in solisyon. In pé i parl in ko-zéstyon.D’ot i parl in l’internasyonalizasyon. An touléka néna travaye pou fé é lo tan pou okipé. Kantamoin, mi éspèr va trouv in solisyon pozitiv pou so réstan lokipasyon kolonyal.
Nora in l’aranzman, nora poin, sof si ni koz avèk madam solèye, ni trouv ar a in bon répons pou linstan.

NB Moin la anvi poz in késtyon kan mèm : é nou dann tousa ? é la Rényon dann tousala ? Nou lé dann loséan indien, mé i diré nou lé anfèrmé dann loséan indien. Loséan lé ouvèr é nou lé konm dann in zol. Mé m’a rovnir la dsi !