Mésyé Borloo la parti bat in karé dann Groenland. Avan li, Madam Angéla Mèrkèl épi Mésyé Barroso, la parti galman. Pou kossa ? Pou rann azot kont par zot mèm bann glasyé i fonn pli vite ké bann savan téi atann, akoz klima i dérèg pli vite, akoz la tèr i réshof pli vite.

Lé bon, domoun i kont dann bann péï, i rann azot kont par zot mèm tout déga in mové politik ékonomik, in mové politik dann lénèrzi lé riskab fé dsi la natir.
Soman, lété pa bézoin alé la-ba pou konète sa ! Nana si tèlman lontan bann savan, bann zournalis l’apré di sa, l’apré film sa, l’apré fé foto.
Épi, shakènn la parti dann in lavion i arfoul dann l’èr in gran kantité gaz karbonik, in gaz “à effet de serre” : soisante tonn par-la ! Nar vali myé, in pé moins k’in pé plis !

Sof ankor ké Mésyé Borloo la ansèrv lo tik-tak danzéré pou l’imanité i apèl lo droi polyé. Sa in mové z’afèr pou vréman ! La pa sa va prézèrv la natir !
Alor, si so bann gran pèrsonaz la pa parti la-ba, arienk pou fé l’intéréssan. Dizon té in pé pou sa galman : fèrblan vide, i fé plis dézord !

Justin