Na in foi, dann tan lontan, bann zanimo la pète in batay. É ! In batay oui ! Akoz zot té pa dakor rant zot pou in nafèr moin la fine oublié. Nana si tèlman lontan ! Kass pa la tète, mé kan té fini lo batay, lavé plin morso zanimo atèr, dann shann batay : sabo, la pate, in tète, in bout kolé, in ké, in bon pogné lo dan. Kossa i sar fé avèk sa ? Bondié, so gran mazisien, la vni oir li la agard bann piès, épi in koud’baguète mèm, li la fé lo chameau...

Bon ! Mé moin la pa apré rakont in zistoir pou fé dor marmay, moin lé solman apré koz déssi zéléksion : zot i konpran sak mi vé dir ? Konm bann fézèr déssin i di : pa la pène grossi lo tré ! Kan ou i lir déssèrtin nom déssi déssèrtin list dézièm tour, ou lé a dmandé si mariaz-la i tienbo lontan. Sirtou, si i marié pa arienk pou gingn lo nom méssié-madanm.

Lé sérié-la ! Mète in lékip anlèr, sé pou dévlop la komine, roganiz sak i fo pou fé in bon lavnir. Mi éspèr dann korbèy mariaz, nana in bon prozé avèk sak demoun la bézoin pou vréman. Mi éspèr in pé la kalkil tousa-la avan pass la bag. Sansa, batay dann park kanar !

Justin