Mé zami, mi rapèl fitintan, parti kominis l’amenn in kanpagn dsi la kantine. Dann tan-la mi pans té in n’afèr normal. Dabor pars téi tienbo près la moityé bann zalokasyon familyal po pèye la kantine épi pou fé d’ot brikolaz téi méte sa dann in fon téi apèl Fasso. Konm nou téi fé kanpagn pou lo l’égalité bann zalokasyon rant bann La Frans épi nou, té falé nou téi fé kanpagn-la.

Nout rézoneman té sinp. Nou téi di vakans konm lékol i tienbo larzan bann zanfan, ébin i fo done azot galman manzé dann vakans. Sa la dir in pé d’tan, é konm nou l’amenn in bon bataye boudikont plizyè komine la fini par donn bann marmaye kass krout dann vakans… Mi rapèl pi si sa la dir lontan, si par ébzanp la dir plizyèr z’ané pars momandoné la donn bann famiy lo mèm préstasyon ké té i done dan La frans. An touléka, mi souvienn sa konm d’in bataye gagné.

Pou kosa mi rapèl sa zordi ? Sinploman pars dopi moi d’mars na pi la kantine lékol-sof in pti pèryod fin moi d’zyin, komansman moi d’zilyète - Alor bann famiy i doi trouv manzé pou donn marmaye matin é soir, zour pou zour é moin lé sir sa i doizète pa fasil.sirtou pou bann famiy pov é pou sak la apovri avèk la kriz. Lé vré la Caf i done bann famiy son kontribisyon tou lé moi, mé sa i fé solman 35 euro par zanfan. Alé nouri marmaye pou trant sink euro si zot i gingn !

Lé ga, mi pans zot va dir sa sé in bataye tèr-a-tèr, mé sanm pou moin sa lé bien nésésèr, pars si ni di i fo bataye kont la grann povrété, i fo vréman lité pou sa épi bann bataye tèr-a-tèr sé bann bataye la plipar d’tan lé bien nésésèr.