Mi koné pa si zot i ansouvien lo tan maréshal féran. L’avé touzour inn-dé par isi par laba é zot lété bien itil : kisoi pou mète lo fèr sou sabo bèf ! Kisoi pou pou sèrkl in rou sharète ! Kisoi mèm pou fagote inn-dé zoutiy té i trouv pa dann kinkayeri. Dann tan lésklavaz lété bann zésklav té i fé sa, mé vi z’ot kapasité, té i apèl azot « bann noir d’talan ». Bann maréshal féran téi koné bien shof lo fèr, fé vni ali o rouz san brilé, aprésa pou travaye lo métal… Kozman marké an-o la, i parl pa lo fèr pou vréman épi maréshal féran pou d’vré, mé konm zot i koné sa i vé dir mouvman lé bon pou gingn fé avans in n’afèr… Néna sa dann l’intèrnasyonal mé la pa moin pou aprann sa bann léktèr nout zournal. Alé ! Mi lèss azot rofléshi la dsi é ni artrouv pli d’van sipétadyé.