Médam, Mésyé, La sosyété, koz èk moin sé koz èk in kouyon mé sé o pyé d’lo mir k’i oi lo mason. Mé zami, mi pans pa sa in kozman kréol mé konm i diré sé lo kréoizasyon d’in kozman. I di pa dann l’internationale-lo shanté-“Battons le fer tant k’il est chaud” ? Moin lé sir an parmi nou néna in ta avèk in paké d’moun i koné kozman-la. Biensir i pé bate lo fèr kan li lé fré, mé mi pans pa lé si fasil ké sa pou amenn ali pran in form intérésan. Figir azot, dann la vil Sin-Lé, l’avé in marésal féran é bononm-la-Biscou mi pans li téi apèl - tout la zourné téi bate lo fèr pou fé in pé tout sort zafèr konm lo fèr dsou la pate bèf, konm mète in fèr dsi in rou sharète épi d’ot zafèr itil ankor. Sa sé lo sans prop é lo sans figiré alor ? Pou moin lé sinp sé k’I fo prépar lo travaye avan fé ali. Préparé lé long mé dizon sé la klé pou la réisite. Alé ! Mi kite azot rofléshi la dsi é ni artrouv pli d’van. Sipétadyé !