Yèr soir, moin la pran lo kar. In kou d’shans, l’arété d’kar té pa loin... dovan ti-bazar Sinni. Zis dé pa pou fé épi moin té fine arivé. Lo kar, sa i fo atann in pé, kan mèm pa bokou, in pti koup de tan. Donk l’okazyon té bon pou argarde in pé lo péizaz. Kèl péizaz, mon dyé ségnèr ?
In lantouraz métalik... i déboush déssi in savane, avèk in pé pli loin in park pou mète loto d’si.
Alors, dann mon tète, mi sèy kakil pou koué la démonte tousa boutik l’avé dann l’androi... pou kossa la kass la kaz demoun konmsa. Si mi souvyin bien, té i doi an avoir in gran magazin avèk bonpé marshandiz, épi landroi pou bann jènn amizé. Sé pa si té i sar pa fé sinéma tèr-la, épi bann komèrs la mode, salon koifèr, éstétisyène é si é sa. L’androi n’ora grouyé avèk demoun, avèk bann z’anploiyé. Baba ! Sinni nora été an l’èr avèk in n’afèr konmsa. Arzoute èksa, té i koute pa shèr pou la komine, pars bann partikilyé nora pèy sa, près toute… la komine nor’avé aryink pou fé l’aménazman térin... karant-kat milyon l’éro solman. Té pa shèr !
Bin kossa l’arivé ? I paré té i mank in signatir lo bon l’androi, é lo mèr l’avé promète in pé, lèss lo z’afèr konm k’i lé. Donk, alala pou kossa nana in gran savane ziska la mèr dann l’androi-la. Poitan, sa nora fé gingn kréol travay sa ! Nora mète l’animasyon dan la vil sa ! Nora done la vil la vi, é ni koné ké Sinni la byin bézoin.
Apré la di va fé in parkaz l’oto. Apré la di va monte in gran l’imèb. Pandann tan-la, nana touzour é ankor in bèl vilin trou a la plas in gayar landroi dann Sinni. Nana k’i bati, nana k’i kass, nana k’i konstrui, d’ote k’i démoli. Nout mèr sosyalis la pa in batissèr, sé plis in démolissèr. Shakinn son bann !

Justin