Ni koné Gilbert Pounia é ni koné ossi in poète la ékrir plizyèr fonnkèr Ziskakan la mète an mizik épi an shanson. Poète-la i apèl Axel Gauvin é sé li k’la ékrir lo fonnkèr « Bato fou ». Bann léktèr Témoignages i koné ali bien : nout zoinal la fine pibliye an fèyton inn son bann roman an kréol, Bayalina.

Astèr pou kossa ni anparl bato fou ?

Pars zournal « quotidien » la fé in lankète an parmi son bann léktèr dsi lo shanté rényoné zot i profèr é an parmi bann shanté La Rényon bann léktèr la plébiscite — Bato fou, in fonnkèr i fé parti d’lo liv-« romanss pou détak la lang démay le ker », l’ékrivèr konm mi di azot sé Axel Gauvin é bonpé rant nou i oi sa konm in sédèv la kiltir rényonèz.

Biensir nou lé pa toussèl — la prèv, lo shoi bann léktèr Lo quotidien mwin la anparl azot an-o la. Lo shoi lé fé par 62 % bann léktèr. Ni pé dir ankor dann bann demoune sité épi zot shanté néna lo shantèr-mizissien-poète Alain Peters ni koné la fine sote la vi mé son prodikssion i kontinyé son shomin.

Lokazyon lé bon pou nou konplimante Axel Gauvin épi ronouvèl nout ladmirassion pou lo group Ziskakan… la prèv nout lang kréol La Rényon néna lo kor pou porte sédèv nout kiltir rényonèz. La prèv galman la mizik rényonèz i gingn porte bann shédèv nout toutt i koné, nout toutt i apréssyé é kan ni parl la kiltir rényonèz sirésèrtin sa la pa in parol anlèr.

A bon antandèr salu !

Justin