Matante Zélida la ékrir Justin :
Mon shèr nové, mon spès salté,
Moin lé a dmandé pou koué, zot, bann rouj-de-fon, i pran azot... pou fé la moral toulmoun… ziska pou fé la moral nout ti prézidan la Répiblik. A, pou zot, li tyinbo pa byin son rol ? Pou zot, lo bato France nana poinn kapitène ? Pou byin amontr azot z’ot bourik sé in bourik pou vréman, nout prézidan la travay a tou-kassé : li la okip la Koup di monn foutbal, la rényon lo G-uit, épi lo G-vin. La nuite avan, li la parti vizite in kartyé danzéré. Alor, si sé konm sa abandone lo bato, mi koné d’bato pli abandoné k’sa. Tok ! Pran sa pou toi !

Justin la fé pou répons :
Mon vyé matante k’i koz touzour la boush rouvèr,
Ou i anparl amoin lo bato France. Pou ou, li lé byin dirizé. Vi koné, i pé an avoir dé manyèr pou mal-diriz in bato : kisoi kan ou i fé pa aryin, ou lé pa la èk sa… sansa kan ou i okipe toute zafèr, domi-domi, é ou i lèss pa fèr sak nana in n’afèr pou fé. Mi pans sé lo ka lo bato France : lo prézidan i shamèl partou. Li kroi in n’afèr lé byin okipé ké par li. Lé zot, sé konm zéro la gosh in shif… na poinn valèr. Alor, forsé k’lé shoz i marsh pa konm k’i fo. Forsé lo bato lé pa byin komandé. Moin lé prèss anvi d’dir, san tro égjajéré, pou émite in pé la shanson : "lo Bato France sé in bato fou !"… ousa banna i amène aou ?

Justin