Dosi sak mwin la vi dann télé, fransh vérité, si sé aryink sa, na pwin pou kas la pat in kanar, ousinonsa pou kas la pat in bib. Konbyin ralé pousé konm sa nou la finn vi ? Fo krwar banna i pran travayèr pou vréman pou in bann kalamouk ou sinonsa konm bandi gran shomin. Lo pli gro déga mwin la vi dann télé, in shomiz déshiré, lé vré lo shomiz té blan èk in kol blan. Aprésa navé pwin lo san ? Mi di sa par rapor dabitid la lwa i di “Si na pwin lo san ni vyin pa“.

Fo la zistis i pass vit, désertin i di, donkalor gran matin siz èr zot la souk lo sink travayèr inkriminé zot kaz, i roprosh a zot dawar èt violan dann in rènyon travay. In rényon travay pou anons ban syndika èk travayèr lo lisansiman in bann. Dan in sitiasyon d’kriz konm ni viv zordi, kisa i pé èt fièr artourn pol anplwa. Ala poukoué banna té bandé an trantsis, ni pé konpran pou kosa lo nèr la monté. Pou otan sa i mérit i trinn a zot dovan la zistis zis pou sa.

I di lavé bokou d’violans zour la. Kisa lé violan anndan la ? Lo patron ki vyin boush anfariné, anons bann travayèr zot lisansiman, 3000 i di ousinonsa dé trwa boug la déshir in shomiz ? Kisa na plis valèr, 3000 shomèr ou sinonsa in shomiz, minm si sé in shomiz la mark ? Ousa i lé la violans, kan dann in lantropriz i kont pi lo nonm moun i tié a zot ? Ousa i lé la violans kan bann travayèr i sibi tout sort maltrétans ? Baya koué i pé roprézant in travayèr pou zot ?