Matant Zélida la ékrir Justin :

 
Mon shèr nové, mon spès salté,
Sa in drol z’afèr pou vréman sa ! Tout demoun i sort voté na zis sis moi pou in nouvo prézidan La Répiblik. Sis moi lé long, mé lé kourt osi é kan la mète aou anlèr pou sinkan, sis moi lé vréman pa tro long. Normalman, sé sak in pé i apèl lo léta d’gras, mé so kou isis na poin lo léta d’gras. La kot konfyans lo prézidan i arète pa dsann, i dsann, i dsann, i dsann, talèr v’ariv o fon. Lé vré, dopi li l’ariv prézidan na arienk mové nouvèl pou bann Fransé é pou bann Rényoné : shmaj li, fèrmtir lizine li, goumantasion z’inpo li. Sa i vé dir, na dé shoz i fé avèk la krash, mé la pa gouvèrn in péi. Biensir zot té i pans té i fo mète Sarkozy déor, mé mète ali déor la pa shanj la sityasion. Boudikont, li artrouv ali konm Sarko é lo tan va passé épi li osi zéléktèr va mète ali déor. Va mète in pé lo tan, mé avèk la présyon v’alé. Tok ! Pran sa pou toi !
 
Justin la fé pou répons :

 
Mon vyé matant k’i koz touzour la boush rouvèr,
L’èr-la, la fine pass solman sis moi é d’apré sak ou i pans sé lo komansmann la fin pou François Hollande. Si ou i pans konmsa, tan myé pou ou, mé pran pasyans. Tout fason, la pasyans i guéri la gal. Pars, si ni fé travay in pé nout koko, nou lé blijé romark, bann politisien, bann patron, bann moun i di zot lé ékonomis i fé plito konm madam solèy, ké konm demoun i baz dsi in bon kalkil la réalité. Zot i bate kart pou prévoir l’avnir, mé sanm pou moin in n’afèr konmsa la pa rasyonèl ditou : bann moun la lé abityé tronpé é moin lé sir zot va tronp ankor. M’a dir aou franshman, li la fé anou promès kan li lété Sin-Lui é ni atann li tienbo son promès, é li di anou dann konbien lo tan li va tienbo son promès. Pétète li atann in lanbéli pou sa ? Li di dann dé zan lé shoz v’aranjé. Nou va oir ! Si i aranj lé dos. Mé si i aranj pa, bann moun la tronp la popilasyon na lo kont pou rann é oplis i sava, oplis la vi va donn nout parti rézon. Firamézir, demoun va rann azot kont, i fo ni baz dsi nout prop fors pou marsh dsi nout dévlopman*. Tok ! Pran sa pou ou !

 
 Justin 

(*) Arzout èk sa i fo pa obli La France i doi anou in réparasion. Nou lé fine anparl de sa !