Mi sort antann dann télé, bann Fransé i intérès pa tro z’éléksyon prézidan la Répiblik. I parétré, banna i kalkil, z’éléksyon-la i sar pa pèrmèt trouv in solisyon pou la kriz. Mé pétèt la vérité sé pa sa, pétèt la vérité lé kashyèt in n’ot l’androi. Kèl koté ? Par égzanp, sa i pèrmèt bann gran médya pa tro di, dan l’opinyon, zot kandida Sarkozy l’apré pran lo fon. L’èr-la, i vo myé parl d’ot shoz an atandan in mirak… mé, sanm pou moin, zot v’atann lontan.
Anou Rényoné, mi pans pa sa lé vré. Pou kosa ? Pars nout l’anvi, nout l’intéré, sé d’bat Sarkozy a-tèr, é oplis li dékaniy, oplis sa i done anou l’éspoir. Apré nou va oir lo rèst ! Lo rèst, sé, pou nou, oir aplik bon solisyon pou tir anou dann mal pasé. Mi sar pa rodi tout bann shif i amontr bien ni pran lo fon é plizanplis. Mé lo program bann kandida, la pa sa, va tir anou dann mové pa. Nout maladi anou lé pli danzérab sèt banna dan la Frans si tèlman k’lo soin i pé pa èt lo mèm. Kosa sa i vé dir ? Sa i vé dir, si désèrtin kandida nana bon mézir pou la Frans, k’i pé atann bon rézilta pou la-ba, pou nou, sa lé pa sak i fo pou vréman.
Sé pou sa nout parti, si li la di li vé bat Sarkozy a-tèr, li vé galman la-ba dan la Frans i tyinbo kont sak li vé pou La Rényon. Ziska zordi, banna la shoizi pou nou, mé lo rézilta la pa sa. Donk so kou isi, sé nou va propoz nout solisyon. Sar pa lo mèm, é so kou isi, v’amèn bon rézilta pou nou. Sé sak mi kroi, dann fon mon kèr !

Justin