Oté

Baz dsi out zérèr pou avanss dan la vi » : in kozman pou la rout.

Justin / 25 zanvié 2021

Méssyé, Médam, La sosyété, koz èk mwin sé koz avèk in kouyon, mé sé o pyé d’lo mir k’i oi lo masson. Mézami,in zour mwin la antann in moun apré fé son projé pou l’ané : néna bonpé d’moun i fé sa. Li té apré di, li sava fé konm son bofrèr la bien réissi dann lélvaz volaye...In moun in pé rézonab la domann ali si li, pèrsonèlman, li l’avé déza fé kékshoz dann son vi. Li la réponn li la fine ésèye fé plizyèr zafèr mé shak foi li téi panss réissi, é li téi éshoué. Alor lo grmaoun la di ali : sak out bofrèr la fé, é koman li la fé, pou kossa li la réissi sirman li koné pa. Lo jenn marmaye la aprouvé .Alor lo vyé la di ali :mé out bann zéshèk wi koné lo koman é lo pourkoi é si ou l’avé pou rofé wi roféra pa parèye. Donk li pé astèr fé in n’afèr épi réissi-sé l’èr sé lo moman. Li la kalkilé épi li la di,li néna in prozé li vé fé dopi lontan é li panss sète-la li va nyabou fé astèr-koméla. Lo gramoun la di ali, li koné pa kossa i lé, mé si li la fine tourn sa dann son tète in kantité foi é li la pa abandone sa sé l’èr pou li réissir. Alor lo jenn gars la di, mèrsi lo gramou pou son bon é li va suiv konsèye-la. Mwin la pa rovi lo moun mé mipanss li la prann in bon désizyon.Alé ! rofléshi la dsi é ni artrouv pli d’van.Sipétadyé.