Mi koné pa si zot i pans konm moin mé moin pèrsonèl mi oi la vi konm in répétisyon. Bann z’annui ou la gingn yèr, lé posib ou i sava argingn azot domin. Sak la kontant aou yèr, lé posib va kontant aou dann out domin. Si sak mi di lé vré, sa i vé dir dann la vi néna in gran kantité sityasion donk si lé vré, ébin ni pé tir loson dsi sak l’ariv anou yèr, pou amenn nout vi domin. Bann provèrb-mi apèl kozman pou la rout - sé in bann saz la tir loson épi la donn anou lo prinsip k’i doi sèrv anou pou amenn nout vi bien konm k’i fo. Mi sava pa répète pou zot bann provèrb moin l’apré anparl dopi dé zané é dé zané-2014 si mi tronp pa ; mé ni pé di sinploman i fo shakinn i tir son loson par raport son bann réisite konm par raport son bann zéshèk. Mi pans sé konmsa mèm ni pé ariv a ronouvèl nout bann réisite, konm bar shomin tout bann lanspèk l’apré anbar nout shomin dan la vi. Alé ! Mi kite azot rofléshi la dsi é ni artrouv pli d’van. Sipétadyé !