Mwin la tandi dir é i romont lwin minm dann tan lontan, dann zané swasant, kan in moun navé in maladi grav, in maladi pérsonn té i trouv pi lo bout é bin gramoun té i di “Minm doktèr kaling va pa nyabou guéri a ou“. Doktèr kaling té in doktèr té arèt sin d’ni, li lavé in bon répitasyon, son répitasyon té i dépass minm sin-d’ni, li té rokoni konm lo méyèr, sé pou sa té i di, si doktèr kaling la pa nyabou, prépar a ou pou kass la mok.

Sanm pou mwin léta nout péi zordi i rosanm sad in kor malad préké paré pou kass la mok si ni port pa tansyon. Lo batiman lé an fièv dopi in sominn préské pou gingn inn ti ginn goumantasyon, i di kouran i pass pi rant travayèr èk patron, inn i koz pi èk lot. I prétan dir tanto bann dokèr i rant dann ron. Sominn dérnié bann moun la bank, apréla bann zazan konsèy zénéral, bann zèn, féramézir boubou i sort ot an ba.

La, ni wa problinm nout péi lé konpliké pou vréman, lo sistinm i réponn pi, konm la bon o, mi wa pi kèl doktèr va nyabou trouv in solisyon.la fot kisa ? Drwat konm gosh ziska lèr i rafistol lo nafèr, i mèt aryink koplas d’si la zanm doboi, san tyinbo kont nout dogré d’kor. Pwatan an dérnié doktèr i mank pa la Rényon, sétaki i rovandik lo dwa sov a nou, mé tansyon tro mèt nout konfians dan la min banna, souvan-dé-fwa i rosort doktèr lo sikré !