Kèl prékosyon ?

Mézami, mi rapèl in zour l’avé in karikatir dann zoinal é tout in bann moune lété apré mète an avan in prozé téi sort dann program Paul Vergès é sète parti kominiss – konmsi zot lété lo linvantèr - Dann fon lo zimaz, l’avé Paul Vergès - an karikatir – apré ékouté é li téi di konmsa :

« Zot la panss mon droi d’otèr ? »…

Pars toute la band té apré volé son zidé sinploman san kass la tète. Mi rapèl kan Elie lété apré fé in konférans dann gran salon l’otèl de vil, Gilbert Annette, dann son diskour la di fraz-la é m’a rapèl ali toultan. Li la di, si téi falé pèye droi d’otèr Parti kominis, sète-la noré té lo parti lo pli rish La Rényon.

I fo rofléshi la dsi !

Zordi, Paul lé mor dopi sinkan é d’issi d’laba déssèrtin i rode trape dann son program sak zot i panss i pé ansèrv azot. Si Paul lété la, mwin lé sir li nora pa roprosh arien pèrsone. Sof pétète in n’afèr : kan zot i pran kékshoz, zot i pran la konklizyon, zot i pran pa tout shomin lo parti é Paul li mèm l’avé fé pou ariv in propozisyon bien konm k’i fo.

An pliss mwin lé sir in pé rant zot lé pa an éta pou sézir sak ni pé apèl la suite dann bande zidé, la filozofi lo projé. La panssé Paul lété pa in liv rossète. Sé pou sa i vo myé baze dsi lamark kédsi lo soumark. Mi panss zot i konpran amwin astère.

Justin