Oté

Baz plito dsi la mark, ké dsi la soumark

Justin / 13 novanm 2020

JPEG - 43.6 ko

Mézami, si mi di azot in n’afèr, lé possib zot i kroira pa moin. Lé possib, zot va dir amwin intèt intèl néna bon zidé, bann zidé nèv, bann zidé solidi, i pé apiy dossi pou avansé. Mé poitan sanm pou moin i fo pran in prékosyon. Kèl prékosyon ?

Mézami, mi rapèl in zour l’avé in karikatir dann zoinal é tout in bann moun lété apré mète an avan in prozé téi sort dann program Paul Vergès é sète parti kominis - konmsi zot lé té lo zinvantèr-Dann fon lo zimaz, l’avé Paul Vergès apré ékouté é li téi di konmsa : « Zot la pans mon droi d’otèr ? »…pars tout la band té apré volé sinploman san kass la tète. Mi rapèl kan Elie lété apré fé in konférans dann gran salon l’otèl de vil, Gilbert Annette, dann son diskour la di fraz-la é m’a rapèl amoin toultan : li la di, si téi falé pèye droi d’otèr Parti kominis, sète-la noré té lo parti lo pli rish La Rényon. I fo rofléshi la dsi !

Zordi, Paul lé mor dopi katran é d’isi d’laba désèrtin i rode trap dann son program sak zot i pans i pé ansèrv azot. Si Paul lété la, moin lé sir li nora pa roprosh arien pèrsone. Sof pétète in n’afèr : kan zot i pran kékshoz, zot i pran la konklizyon, zot i pran pa tout shomin lo parti é Paul li mèm l’avé fé pou ariv in propozisyon bien konm k’i fo. An plis moin lé sir in pé rant zot lé pa an éta pou sézir sak ni pé apèl bann zintèraksyon rant in projé épi in n’ot projé, épi lo konsékans rant l’inn é l’ot dsi l’avnir La rényon. Pli dir ankor pou zot konprann la filozofi in projé pars li néna ossi son filozofi. An tou lé ka sé sak moin la aprann dann bann rényon parti kominis é sak mi kroi zordi ankor.

Mézami, si lo déstin l’avé amenn amoin in zour pou fé in prozé dann l’intéré nout péi épi nout pèp, moin noré kalkil bien konprann lé shoz. konprann lé shoz ? Sé konète konm i di lo tonan é lo zaboutissan, bien konprann dann kèl dispozitif sans larz lo prozé i kal ali, bien kalkil lo méyèr fasson sèrv l’intéré nout péi épi nout pèp é si néna in poin K konm komansman épi in poin F konm finisyon épi lo shomineman fant lo poin k épi lo poin F san kalé si possib. Pou sa, baz dsi la mark é pad si lo soumark konm moin la mark an-o la.