Donk, moin la antann dann radyo konm dann télé, dan la nuit samdi 7 mars pou alé dimans 8, la méri Sin-ni téi roganiz in “marché de nuit” déssi la plas Barashoi.
Ala in linisyativ k’èl lé bone ! Dann mon kèr, mi di konmsa, sa va évit amoin lèv bonèr dimansh pou alé marshé forin Shodron, vik moin nora fine fé mon komisyon dan la nuit. Mon madam té dakor, pars d’apré sak èl i di, va évite amoin alé kas la blag initil déssi marshé forin.
Ala k’ni désann la ri d’ Pari, an parmi in kantité d’moun. A ! mouvman lé bon ! Mé sak i trakas amoin, sé k’nana in bonpé d’moun i armont la ri avèk aryin ditou dann z’ot min. Mèm mi antan in komik apré kas lé kui in madam avèk in gran tant malgash. Li di èk èl : « La pa sir ou i sa trouv zafèr pou ranpli out gran tant-la… ! ».
In néstan, nou lé fine ariv an-ba. La, mi sava fé mon bazar. Oté Baya ! Kosa nou la vni fé la ? La nuite nana, mé bazar la poin... In pti zizite loin-an loin, in pti léstati, dé-troi bonbon, in pé la kouyonad… !
Oté ! Mésyé lo mèr, ou lé for pou la kominikasyon ou la ! Èk in po d’patat, ou i ranpli in éstade, ou ! Konm di mon granmèr : « Ou i nyabou fé in noss avèk in ké d’mori… ! ».

Justin