Oté

« Bèf dovan i boir lo prop »

In kozman pou la rout

Justin / 9 zwiyé 2020

JPEG - 43.6 ko

Médam zé Mésyé, la sosyété, koz èk moins é koz èk in kouyon, mé sé o pyé d’lo mir k’i oi lo mason. Sans prop sa lé pa difisil pou konprann : kan in bann bèf i marsh a la fil indyène, sak lé anpromyé sé li k’i boir lo prop, sé li k’i manz in pti touf zèrb bien fré, bien jenn, bien gouté. Sak i ariv déyèr, ébin li pran sak i rèss. Boudikont, sa i vé dir i vo myé ou i ariv avan lé zot pars avan sé touzour lo méyèr plass. Ariv apré si ou i vé mé mi garanti pa ou dsi la kalité d’sak ou i sava trouvé. Mé in pé i di pou lo pri sésak i fo, pars ariv apré ou nora lo sold. Zistoman lo sold la pa la kalité. Alé ! Mi kite azot rofléshi la dsi é ni artrouv pli d’van. Sipétadyé.