Pou bann gro transpor la plipar d’tan sharète té i fé l’afèr avèk in bèf dovan épi in bèf déyèr pou ranplass lo bèf dovan kan la fors sète-la té fine fatig in pé… Tazantan l’avé in filé d’lo sansa in pti kouran d’lo téi travèrs. Biensir lo bèf dovan téi sèrv ali an promyé, lo-la té fré, té bon mé kan téi ariv lo tour lo bèf déyèr la bou té fine mélanzé é bèf téi boir pa avèk apéti. Kroiyé moi !

Mé sak nou l’apré di i dépass in sinp zistoir bèf é sa i konporte in losson d’vi an sossyété. Késtyonn dir sak i ariv lo pre i sèrv ali an pre é sak i ariv apré ébin li kontante ali d’lo réstan. La sossyété d’avan lété konmsa sète koméla lé konmsa ankor sof kan demoune gran kèr i aksèp lo partaz mé mwin la pèr pou bonpé d’moune sa sé in prèv féblèss é in sakrifiss arien i zistifyé pa.

Alé ! Mi kite azot rofléshir pou zot fèr lo shoi rante in mond pirate épi in mond zénéré mèm si mi koné dann fon son kèr noute sossyété lé pa si tèlman tourné vèr la zistiss é la sharité. Ni retrouv pli dvan sipétadyé.

Justin