Dann tan bèf téi ral sharète, sansa téi transport bazar, an avoir in bèf té in vré kapital. Mé pa in kapital konm in zoryé larzan. Bèf té in kapital, par raport lo travaye li té i pé fé. Bèf pano té ékipé pou port bèl-bèl sak shak koté é mèm li té i amenn son mètr dsi son do. Mé na in n’afèr i fo konète, in bèf té pa in zanimo trankil, pasifik, téi ariv li nèrvé tazantan é kan li té i nèrv té i falé fé antansyon. Si li pèz aou kont in pyé d’boi li fé fé pète out léstoma, sansa out foi é transport aou vitman koté d’tanto. L’aksidann bèf té pa rar. Mé si ou l’avé nyabou pass in kord dann son fèr d’né, té ou téi komann ali, pa li pou komann aou, ni komann son kord. Sa sé sans prop mé pètète néna galman son sans figiré é sé sak nou va oir domin mèm l’androi dann nout zournal.