Désèrtin i di galman : « koshon i komann pa la kord ! ». Néna inn-dé zour moin la anparl provèrb-la é moin la di li néna son sans prop épi son sans figiré. Sans prop, sé kan néna in vré bèf sansa in vré koshon, avèk in vré kord pasé dann fèr d’né pou lo bèf, dann zargano pou koshon. Astèr sans figiré ! Dann kèl ka i trouv sa ? Dann diksyonèr Alain Armand, moin la lir sé in prinsip konm la loi lo pli for. Si la kord lé épé épi bien trésé, sé èl é lé pli for. Bèf lé kosto oui, koshon néna son poi dakor, mé sé la kord i komann. Alé ! Mi lèss azot rofléshi la-dsi é ni artrouv pli d’van sipétadyé.