Sa in kozman i romont dann tan l’avé sharète an kantité in pé partou dsi la rout é na poin si lontan k’sa. Rode la paye ? Té i rode an sharète. Rode de lo ? Parèye mèm. Amenn kann balans ? Dann sharète. A propo d’kann : si lo shartyé té i fé antansyon kan li té isava sharète plin ziska balans, pou romonté li té i rant dann sharète é téi tard pa li téi ral son karang. Bèf i koné shomin ! Sorman li té i lèv kan dé sharète téi kroiz inn a l’ot pangar l’aksidan. Sa sans prop mé si l’poinn vizé d’lo sans figiré ? Sanm pou moin, sa té i vé dir sinploman si kékshoz i marsh bien tousèl, la pa bézoin maye dodan. Si ni kalkil bien néna in bonpé z’afèr i pé marsh san nou, pou kosa ni partiré mète nout grinnsèl initil dodan. Alé ! Mi lèss azot rofléshi la dsi é ni artrouv pli d’van. Sipétadyé.