Koz èk moins é koz èk in kouyon-mé sé o pyé d’lo mir k’i oi lo mason. Mé zami, mi koné a si zot i an souvien dann tan, in pé partou l’avé sharète bèf kisoi pou ral kann la balans, kisoi pou al érode la paye, jisoi ankor pou alé shèrch dolo, mèm pou fé komisyon : in bal do ri lé pli lézé si sé bèf k’i transport ali. In bèf té in kapital dann tan é lo propriyétèr té i av èye bien son kapital. Moin la kon ète demoun téi amar la kord bèf avèk in pyé d’boi pou anpèsh lo zanimo alé-moin lé sir bann pli zansien i lir amoin i koné osi tik-tak la. Mé kosa sa i vé dir konm probvèrb, inn foi nou la fine tir lo bèf, lo kord épi lo zèrb a manzé ? I rèss in moun bien an parmi son sosyété apré rode son nésésèr pa tro loin l’androi li lé. Sa lé vré pou li, pou moin, pou zot, pou in ta d’moun lé kazanyé épi i shèrch son bonèr dann son landroi. Dé foi i rod pli loin, mé i arvien son l’androi kan la pa trouv arien pli loin. Alé ! Mi kite azot rofléshi la dsi é ni artrouv pli d’van. Sipétadyé !