Sa sé in kozman dann tan lontan kan tout plantèr é mèm d’ot moun l’avé in bèf pou ral son sharète. Kan bèf té i kas la kord, li té i fish an avan é té komode trap ali avèk la kord té i kour déyèr li. An plis, la kord té anmaré avèk lo fèr d’né alor kan ou téi trap la kord sa téi fé mal lo zanimo é la plipar d’tan té i fé rès ali trankil.

Sa sé pou lo bèf, mé la lang, konm i gran fabilis grèk i apèl Esope téi di, sé lo méyèr é lo pli mové z’afèr an mèm tan. Pou lo bon koté ni pé kozé, mé pou lo mové koté, kréol i di : « Intèl la lang i grate ! ». Sa i vé dir li di dé shoz lo moun la pa bézoin konète é sé li ké lé kapab fé an-nuir ali, sansa fé an-nuit lé z’ot. Pou anshé vé zordi demoun i koz dann radyo, sansa dann z’ot téléfone ipad. Gran zorèy [1] l’apré ékout ali é li koné pa !

Kosa zot i anpans ? Arien ditou ? Fé travay z’ot koko ! Fé bouir z’ot matyèr griz ! Zot va oir ké rant-rant ni pé z’ète, tazantan, dakor rantre nou.