Dizon sé par azar mèm zour mwin la vi plizyèr pèrsone apré prézant zot bèf moka avèk lo Prézidan konsèye départmantal pars bana laba dann l’ouèst la konsèrv la rass bèf moka è sa ossi sé in gayar kalité bèf mé zot la bien di zot sar blizé arété pars sa i koute azot bonpé larzan.

Astèr dann fon mon mémoir mi rapèl bèf kissoi bèf malgash, kissoi bèf kroizé, kissoi bèf pou ral sharète, kissoi bèf pou nou fé lékilibriss kan nou lété pti, kissoi bèf té i ral sharète avèk in tono d’lo… Mi pé dir azot ankor zordi mi antan bann sharète roul dan mon tète é lé pankor fini pars sé nout listoir anou.zot i kroi pa ?

Mézami in moune néna bèf moka la di sa sé in zanimo l’ariv LaRényon avan demoune l’ariv an kantité… Mi koné pa si lé vré.I paré d’apré li komansman l’avé zébu Madégaskar épi bèf l’afrik. Vré, pa vré, mé aforstan sé in bann bèf La Rényon é sa sé in rass ni doi pa lèss pèrde.

A bon antandèr salu !

Justin