L’État la désid désantralizé : pous dési départman sak li té fé par li-mèm épi an plis domann lo départman fé in bann zafèr pou l’isertion d’moun dann travay. Lé bien ! Solman kan l’état i promète in nafèr i fo oir si larzan i suiv. Si larzan i suiv pa, sé sak la aksèpt lo zafèr, zié fèrmé, lé riskab mord son doi.

Dann zafèr larzan la poin n’famy, la poin n’parti non pli : ou pé ète dann mèm parti lo prézidan, sansa lo gouvèrnman, i ariv li donn pa ou lo pourkoi li la promète. Konsèy zénéral i sort rann ali kont par li mèm... lo kont la pa bon : i mank pa arienk in fran, i mank dé san milion léro. Astèr-la koman i fé ? I anprète ? Anprété lé bon mé i fo rann apré épi gouvèrnman lé riskab di : ou la anprété, olèrk pran in pé pasians, ou lété kontan fé out gran rin, éstèr lé bon pou sa mèm.

Sansa, kosa i fé : domann gouvèrnman pèy son dète ? Bien sir, mé son posh na trou. Alors, afors domandé, ardomandé, va fini par donn aou in moné, mé moin la pa sir lo kont sora bon.
Akoz l’état, la plipar d’tan sé in razèr d’pint ! Avèk li aspèr pa lo pint sar bité.

Justin