Na poin lontan, la fé in somèn san sak an plastik : moin la pa antann tro dézord ! Sa i vé dir la plipar d’moun té dakor èk sa, vik l’anons i tard pa défann ansèrv bann sak an plastik akoz sa i mète pré d’kat san z’an pou dékonpozé.
Donk sa in bon n’afèr, sof la-ba Madagascar, la rouv in gran sipèr marshé, solman la mète komission dan bann sak bio-dégradab. Oui, mon kouzin, néna sak konm sa ! Bin akoz i ansèrv pa La Rénion ? Mistèr é boul de gom, mé i doi z’ète in késtionn larzan... mi sipoz.
A par sa, moin la lir dann zournal, l’EDF l’apré rod in komine i vé bien aksèp déssi son téritoir bann déshé nikléèr. I prétan dir, i sava anpil sa dann bann gran tinèl, pandan kat san mil z’ané... Akoz, i paré, sa i mète tousa tan-la pou dékonpozé.
Alor, mi pans : nou, bann ti kolon, i di anou ansèrv pi sashé akoz sa i mète lo tan pou dékonpozé : ni pé ète dakor ! Mé bann gran sosiété, sa i déranz pa zot mète la poizon desou la tèr san k’i pé savoir kosa v’ariv in zour. Bien antandi, toulmoun lé égal dovan la loi, mé bann ti kolon lé pa égal bann gran-gran vaza : sak lé légal pou zot lé pa légal pou nou ! Bien antandi, kouzin !

Justin