Pou nou sé in vré bonère oir aou vizite anou konmsa alé oir ou néna si tèlman pou fère dann zot konba David konte Golliath. Wi di é ni panss ou néna rézon wi pèrde pa léspoir, wi pèrde pa léspoir pou in rotour gagnan dann péi natal, péi d’néssanss lo pèp chagossien.

Nou ossi, oute bande zami, oute bande kamarade, ni kroi dann zote rotour. Olivier noute kèr i singn kan ni oi bande chagossien privé d’zot péi natal, oblijé rèsté dann bande téritoir légzil.

Nou ossi ni mète a révé zot paradi pèrdi a rotrouvé. Mi koné pa oziss kèl lété zot lémossyon, kèl lété zot santiman, kan zot la tonbe pou anbrass la tèr Pérhos Banos. Ni koné pa oziss mé i étoneré pa mwin zour-la zot la konète in l’émossion for konm kan ni sèrre dsi noute kèr in famiye nou la pa vi dopi lontan.

Tère-mère, mère-terre, ala ton zanfan, ala ton zanfan nou lété séparé si tèlman lontan. Tère-mère, mère-tère ou la pa shanjé é nou ossi nou la pa shanjé dann lamour pou noute tèr-patri.

Kan in zour zot va rotrouv pou vréman ; kan in zour zot va anbrass la tère zot patri ankor épi ankor mi panss zot va di zote tèr-mèr dousman-dousman dan son zorèye : tèr dé shagoss, nou la soufèr léloignman, la solitide, é mil é mil traka mé ni panss ou ossi ou la soufère léloignman oute bande zanfan é mil é mil traka.

Kan zot va di, final de konte, Chagoss ala nou la, ala oute zanfan, ala nou la, pou touzour, toultan é nou ossi La Rényon noute kèr sar kontan pou d’bon

Bonzour olivier. Bien l’bonzour Olivier Bancoult.

Justin