Pa pli loin ké samdi, dann in télé, lété marké-an bande passante-biento in bonpé prizonyé Mayotte va vni la geole issi La Rényon mé i di pan ou pou kossa. Lé vré ni dovine in pé pars nou la pa tyé kouyon pou vol son plass.

Donk ni pé majine in n’afèr :sinploman ni pé dir néna pwin assé la plass dann la prizon Mayotte, pou anklav bande prizonyé. Sa la pa in vré rézon pars kan wi amenn in politik konm sèk La fanss i amenn laba, lé sir nora d’moune pou mète dan la jole. Alor si lo rézilta lé prévizib i fo konstrui par avans bande plass dan La Prizon.

Néna pwin in vré politik l’égalité, si tan tèlman ké demoune dann l’androi i apréssyé pa lo sor i fé azot-Sa lé vré ossi La Rényon-demoune i aksèp pa lo sor lo réjime franssé i rézèrv pou zot. Arzout èk sa lo réjime franssé la kass lékilib l’avé dann la sossyété, la rojète toute valèr lo pèp maoré.

Dézyèm késtyon pou kossa v’amenn banna La Rényon ? nou néna tro d’plass issi dann noute troi prizon ?An touléka mwin la vi l’ote zour in fime dsu la prizon Sin –Pierre é mi trouv pa laba néna in bon kalité d’vi pou bande prizonyé donk si i antass ankor demoune dann prizon na pwin assé la plass , mi oi pa kèl lintéré i pé an avoir.

Astèr mi domande amwin si laba Paris dann bande sèrvis épi bande gouvèrnman na poin in pé dézorde mantal an parmi banna.Pé s’fèr banna dann ministèr i kalkilMayotte comores avèk la rényon lé ziss inn koté l’ote. In tan la ansèrv larzan téi doi alé Mayotte pou agrandi lopital issi La rénion.Mi domande amwin si avèk larzan-la i sava pa aranz la prizon SIN-Pyèr.

Antouléka sak mwin lé sir sé ké sa i sava poz problèm anpliss issi la Rényon.Gouvèrné sé prévoir mé sa késtyonn prévoir sa lé pa étidyé a-fon sa.

A bon ékoutèr :salu !