In nouvo préfé i sort arivé. Koman li apèl ? Mi koné pa, mé moin lé pa présé aprann son nom pars kan m’a konèt, li sar fine alé. In préfé pou in péi l’Outre-mèr, sé konm k’i diré in l’étoil filant. Ou la pankor fé in bon vé ké lo z’étoil la fine disparèt. Final de kont, i vo myé mi koné pa son nom, pars mi koné in pé lo nom banna, mé zot la pa lès arienk bon souvnir La Rényon. Lo pli koni, sé Perreau-Pradier, é konm di lo kont, li la pa fé arienk lo bien dann nout péi. Nana d’ot, konm lo Préfé Philippe, lo boug la di : « je suis venu pour vous gouverner ». Alé oir lété pi lo tan gouvèrnèr. Mi souvien, in takon préfé la roganiz la frod éléktoral ziska l’ané 1971, à popré. Mi koné mèm in préfé, na poin lontan, sanm pou moin l’avé konm misyon fé bat Paul Vergès z’éléksyon Konsèy réjyonal épi la bat dsi lo z’épol in transportèr pou li alé asyèz lo piramid inversé.
Donk, kan lo nouvo préfé i ariv épi i di li vien pou aplik l’ord répiblikin, lé difisil savoir kosa o-zis li vé dir, é kosa o-zis li vien fé. Pars isi i pé an avoir l’ord répiblikin, mé trasé dsi in vyé fon l’ord kolonyal. Pars, ni vé ni vé pa, nou lé dan l’ord kolonyal késtyonn l’ékonomi, késtyonn sosyal… vi k’an tan ké péi sou-dévlopé, nou lé an rolasyon avèk bann sosyété kolonyal k’i fé zot profi épi zot sirprofi dsi nout tèt. Vi k’zot lé la pou transform bann krédi piblik an l’arzan privé.
In dèrnyé mo : zot i souvien diskour Sarkozy moi d’novanm 2009 ? Té in bon diskour sa ! Mé dodan, l’avé pli d’in foi, é li la di pli d’in foi lo mo : "l’éta lokal" konm pou bien fé konprann anou, son om dan La Rényon épi bann péi l’Outre-mèr té lo préfé.
Lété pa in bon tan pou nou, vi k’sa la déboush dsi la politik ni koné zordi, ké la pous anou dann mir la kriz la tèt bésé. Lo préfé, dann La Rényon, la touzour ansèrv pou fé manj anou patat èk la po, é pou apiy lo rin bann kolonyo kapitalis. Zot i pans la shanjé ? Moin mi souèt, mé mi kroi pa. Zot i rapèl la rantré épi bann kontra édé ? Na poin lontan sa la éspasé. Sa la pa in bon poin pou nou, bien antandi... Astèr, pèrsone i anpèsh pa nou souèt ali la bienvéni, pars l’onèteté i di anou i fo fé sa. Bienvéni lo ga, mé pou la politik, i rès a voir !

Justin