Zordi, dsi l’kou dizèr, ou i vien vizite anou. Sé in gran l’onèr ou i fé anou. Sé in gran l’onèr d’rosovoir Promyé minis nout bann kouzin morisien. Ou i koné rantre nou, lé z’inn i kritik lé z’ote mé sa i anpèsh pa nou an avoir bon santiman lé z’inn pou lé z’ot.
Ou i koné, in bonpé rantre nou, i domann lo ko-dévlopman. Sa sé in n’afèr, si mi tronp pa, lé bon pou zot, Morisien, é lé bon pou nou, Rényoné. Mi pans lé bon ossi pou bann Séséloi, nout bann kouzin galman. Konm lé bon, pou bann Madégas, bann péi Komor, péi in bonpé nout z’ansète. Lo ko-dévlopman, pou nou, sé in fasson avansé pou lé z’in konm pou lé z’ot, pou toulmoun boudikont. Konm bann demoun déor, i di, sa in éstratézi "gagnan-gagnan".

Donk, mi pé dir aou, an parlan par réspé, moin lé pa dakor avèk sak i vé baz solman déssi l’il Mauris, pou nou avansé dann tourism, kom dan l’ékonomi an zénéral. Pars, zot Morisien, zot la bien rézon, kan zot i fo in gran lantant rant bann péi é bann pèp l’oséan Indien. Zot na rézon kan zot i fé l’antant èk l’Inn, l’Afrik di Sid épi d’ot péi ankor dann l’antouraj l’oséan Indien. Ankor in foi, zot la bien rézon ! Konm la Rényon, zot lé dann milyé l’oséan, donk zot lé bien plasé pou tras in bann tré-d’inyon rant bann péi déssi l’bordaz l’oséan Indien. Nou ossi nou lé bien plasé pou sa. Arzout èk sa, a rogré, mi doi dir aou, moin lé pa dakor avèk sak i sava sign z’akor, dann nout do avèk zot, konm avèk d’ote péi san prann kont de nou. Konm di in patoi kréol, « ni vé k’i koz dé mé avèk nou, pa san nou ».

Mi arète la pars moin la pèr ou i pans moin lé in pé romonté, alé oir la pa vré. I pé pa ète romonté kont in voizin, in kouzin kan li la bien réissi dan la vi. Mi arète la pou souète aou in bon sézour shé nou. Pou souète aou la bienvenu. Pou dir aou, Promyé minis nout bann kouzin : « Bienvenu méssyé Ramgoolam ! Bienvenu kouzin ! »

Justin