La Rénion la fine konète tout sort kalité politisien : in pé té madré, in pé lavé pa kass kat pat in kanar. In pé lavé bone volonté, in pé téi mazine arienk fé biznèss. In pé, konm ki diré, lavé plis lo vis ké lizine Beaufonds. Lavé ? Non ! Nana. Pa lo passé, mé lo prézan, vik lé ankor vivan.

Kan mi di sa, mi rogard diréksion Sintandré, épi mi majine son sénatèr-mèr. Sa in boug nana défo, é pa pou zoué siouplé ! Li koné la vantardri. Kalkil mantèr, i zène pa li ! Fé la frod zéléksion i anpèsh pa li dormi ! Anbosh nèrvi pou tap demoun la pa son traka ! La konsians demoun, li lé pa la èk sa ! Pa rienk zordi, pa rienk yèr, mé avan-avan-avan yèr. Dizon, li la fé in gran karièr dann bann défo-la, épi li koné shakinn par kèr ...

Oté Zan-Pol, ou i koné demoun i koné aou konm lo loup blan, konm Barabas dan la passion. Dann shakinn out parol, nana in pièz. Mé tanpir i koné aou, tanpir i koné out bann tik-tak. Tanpir ou i kritik out ladvèrsèr, tanpir demoun i kroi pa ou... Ala, mi kado aou in pti provèrb k’i di konmsa : Bilimbi la di mang karote lé èg !

Justin