Lakey lo sit > Chroniques > Oté
Bilimbi la di : « Mang karote lé èg ! »
In kozman pou la rout
zedi 14 novanm 2019, sanm
Mésyé, Médam, La Sosyété : koz èk moin sé koz èk in kouyon-sé o pyé d’lo mir k’i oi lo mason. Mi pans sa in kozman zot i koné dopi in bon koup de tan é d’apré sak mi koné néna dann tout lang kozman konmsa. Kosa sa i vé dir ozis ? Sa i vé dir ou i sava krétik demoun pou zot défo alé oir sé ou mèm néna lo plis gro défo. Dann la lang bann fransé i di pa : Ou i oi la paye néna dann zyé lo voizin, mé ou i oi pa lo pyès do boi néna dan la vote é sa lé bien vré. Mé an mèm tan lo kozman i lans aou in apèl pou oir lé shoz konm k’i fo, san tro insist dsi défo lé zot. Lé ga, nou kréol nou lé for dann in zé konmsa, vi k’nou lé for dann ladi-la fé. Na poin lontan moin té invité shé d’moun é lo bann moun té apré kass dosik dési la bos sak té pa la… Konm moin té pa shé moin, moin la pa di gran-shoz mé la pa lanvi téi mank amoin. Alé ! Mi kite azot rofléshi la dsi é ni artrouv pli d’van sipétadyé.