Moin la fine di é ar-di, in moun la droite sé in mantèr, mé nana lé pliz-ou-moin. Désèrtin sé in bann kador dan la mantri ! In l’égzanp, par azar : Sarkozy. Pou moin, si Obélix la tonm dan la posyon mazik kan li té pti, Sarkozy la tonm dan damjane la mantri. Koman li la fé, mi koné pa, mé pou èt vré, sa i doi z’èt vré. Na dé foi, bononm-la, dann in fraz, i nyabou ramas mantèr troi-kat foi, épi kan in vérité i koins dan son soulyé, ala ké li sharj de lo. Sé son dézyèm natir ! Sé konmsa li lé fé.
Dan lo sobatkoz zot dé François Hollande la améné, sa lété klèr konm lo i sort dann rosh. Li la manti dsi lo shomaj, li la manti dsi nivo d’vi, li la manti dsi la shèrté la vi, li la sharj de lo dsi l’émigrasyon, dsi z’inpo, dsi lo randman travay. Aprésa, sé li k’i trèt mantèr lo sobatkozèr kont li. Si tèlman, momandoné, l’ot la di ali, li na arienk lo mo mansonj dan la boush, konmsi sa té in n’afèr té vréman dan son natirèl. I falé oir ali toutsuit pran l’èr in shien la gingn in kou d’galé. Mé l’ot la di ali konmsa, sar difisil pou li d’pas pou in viktime apré tousa déga li la fé dan la Frans pandan sink-an, lo sink-an vash mèg, konm i di dann liv la bibl. Plis in milyon shomèr an sink-an, mé lo boug i donn la démanti Pol Anploi é li di na arienk kat-san-vinn-dé-mil shomèr an plis... alé oir in milyon, sa sé bann shif ofisyèl.
Mon bann dalone, mon bann dalon, zot i koné kosa i lé bilinbi. Zot i koné sa lé èg, vèy pa koman… mèm si i pé fé bon rougay ansanm, si i pé fé galman bon konfitir. Mé si zot i konpar sa avèk mang karote, moin lé sir, san pour san in marmay sansa in granmoun va port son préférans dsi lo dézyèm. Mi pans zot lé dakor avèk moin ! Kan la fé lo déba rant François Hollande é Nicolas Sarkozy, sa la dir lontan, mé shak foi Sarkozy la rouv son bèk pou di son l’advèrsèr lé mantèr, sansa di lo mo mansonz, moin té i pé pa anpèsh amoin mazine lo patoi kréol k’i di konmsa : bilinbi la di, mang karote lé èg.

Justin