Médam zé Mésyé, la sosyété, koz èk moin sé koz èk in kouyon mé sé o pyé d’lo mir k’i oi lo bon mason. Mézami zot i koné bilinbi ? Zot i koné galman zirinbèl ? In lé ron épi jone, l’ot lé in pé alonzé, mé lé dé lé èg vèye pa koman. I paré sa i pé alé an konfitir, sansa an rogaye, mé tèl ke sé, maye pa : lé difisil manz in kékshoz konmsa. Mang karote la pa parèye kisoi vèr, kisoi jone - sirtou mang karote piman désélé - kisoi mir-ankor mir désèrtin i yèm pa tro pars i fé tro filas. Astèr kosa sa i vé dir konm provèrb ? Sinploman ké lé fasil tir défo dsi lé zot an ou bliyan son prop défo. Dann la lang bann fransé id i kékfoi : i oi la paye dann l’èye lo voizin, mé i oi pa la poutr dann out prop zyé é sanm pou moin sé lo mèm zafèr ké nout kozman kréol rényoné. Astèr pou kosa mi di sa ? Pars dopi in pé d’tan, mi antann désèrtin i krétik sosi, i krétik sola, i krétik afonn train alor mi pé dir azot défoi sa lé fatigan. Alé ! Mi kite azot rofléshi la dsi é ni rotrouv pli d’van . Sipétadyé.