Kan in télé i rosoi in moun li èm bien, li poz pa bann késtion k’i fash. Domaz, akoz sa noré pèrmète la pèrsone, sak i rogard lo lémission, aoir in lésplikasion konm ki fo...

Mésié Chateauvieux la vni la télé, la ésplik anou koman la SAPMER, son sosiété, i donn lo grin, i ashté bato, i rant dan la Bourse, i anbosh demoun. La dsi, na poin rien pou dir ! Sof, si SAPMER té gingn pa fé pliské sa pou La Rénion ! La pa poz lo késtion, nou nora in répons kan poul nora korn dsi la tète... Touléka, nou la antann lo thon sar travayé dann Séychelles épi Lil Maurice pou fé bann produi bon kalité !

Lété in lobligasion, lété pa in lobligasion ? Lé vré, i di anou ashté bann zaksion ? Dakor pou sak i vé épi pou sak nana lo voul. Mé méssié Chateauvieux, la pa larzan i mank bann vaza la Rénion ! Plas travay i mank bann ti-kolon, épi bann jènn sirtou.Oubli pa zot !

Pou nout par, ni pans La Rénion té i mérite son lizine lo thon : pétète dsi déssèrtin zafèr nou lé pa pli for k’banna, mé ni siport la konparézon dan d’ot domèn.
Alors, mon késtion lé la, dsi l’bout mon lang : La Rénion la-dan ? I kont pou la po patate ?

Justin