Mi pans zot lé konm moin. Dann kèl sans mi di sa ? Dann sans zot konm moin, ni réspir rényoné, ni manz rényoné, ni pans rényoné, ni koz rényoné, ni soufèr rényoné. A ! La Rényon si ou i savé konm ou lé prézan dann nout pansé, dann nout konsyans, dann nout shèr, dann nout l’am ? Sanm pou moin, noré do koi fé roprann aou favèr.

Akoz ropran favèr ? Pars néna doulèr dann moun isi la Rényon, néna soufrans dann kèr bann rényoné, néna la kolèr, néna léspoir galman mé léspoir la dékaniye in pé sé tan si. Si l’avé pa dékaniye tan ksa, nou noré pa parti rode bann profète i sort déor pou mète anou in pé anlèr.

Oté Sarda toué la roul anou, ton zoli kozman roul anou dan la bou ! I paré sé ou la koup la shène lésklavaz isi La Rényon. An touléka sé sak demoun i kroi.

Poitan si mi rogard bien : nou lé nonbré isi La Rényon an tan ké rényoné. Si mi rogard bien néna demoun valab isi shé nou. Néna in kiltir rényonèz, in lang rényonèz, in konsyans rényonèz. Nou lé isi dann l’oséan indien konm Maurice, Madégascar, Sésèl, Komor, Sagos : nou sé bann ziloi é nout zansète la sort in pé partou pou mélanz isi dsi la tèr rényonèz.

Mi rapèl in gran om politik téi di parfoi : sak i amar anou ansanm lé pli inportan ké sak i diviz anou. Donk si ni rogard sak i uni anou, ébin li lé pli for, bonpé foi pli for ké sak i diviz anou, si solman ni gingn tienbo kont in réalité konm sa. Epi, bon dyé ségnèr, ni apè La Rényon !
Alor rényoné alon mète ansanm. Groupir rényoné ! Groupir !