Mézami, zot la déza antandi sa ? Pétète pa mé pou ma par mwin la touzour antande dir sa, san tro konprande dann tan mwin lété pti. Sèl zafèr téi fé rir amwin konm téi fé rir lé zote. Mé aforstan rofléshi mwin la fini par konprande sa téi vé dir fé lé shoze alanvèr.

Zot i koné néna partou dsi la tère, galman shé nou la Rényon demoune i marsh souvan dé foi dsi la tète olèrk marsh dsi zot dë pate si tèlman ké zot i fé lé shoze an dépi d’lo bon sans é sé pou sa mwin la antande kozman-la souvan dé foi é mi pans pa mi sava pi antande ali.

Alor mi konsèye azot bien rofléshi la dsi é sirtou pa d’bingn kanar pou mète dormi. Pars la poin arien d’bien ladan, la poin arien d’rézonab.

Ni artrouv pli d’van. Sipétadyé !

Justin