Mi koné provèrb-la i égzis ; mi koné mèm demoun i di sa, kan zot i kroiz in moun bu. Pars kan ou i rogard in moun bu, é ou i oi al ialé a gosh, alé adroit, artourn koté li sort, dann out kèr ou i pans néna lontan loto té i doi an avoir fini kraz sa. La pa ké ou i souète, mé ou di lé riskab, é fransh vérité tazantan i ariv. Moin pèrsonèl, mi doi dir sa la pa in kozman i bote amoin pou vréman. Pou kosa, pars, sanm pou moin, dann fonn kèr in moun i boir an plisk’i fo, néna sirman in gran soufrans pars sansa mi konpran pa pou kosa li l’apré abèss ali konmsa dovan la sosyété. Mi souète solman li ansort ali. Pa an pasan sou la rou loto, mé an arétann boir. Pétète zot va trouv mi fé l’intérésan kan mi di sa, mé mi jir ké non. Alé ! Mi lèss azot rofléshi la dsi é ni artrouv pli d’van sipétadyé.