I paré téi vann pa touzour toute, é kan téi arète tro téi vann banna dèrnyé vandrodi d’lo moi d’novanm. Bien sir téi vann pa o pri, mé in pé an solde. Si tèlman bann zésklavaziss téi pé goumante lo nonm zot zésklav. Antanssion lé ga, sa téi éspass ossi dann péi Bourbon épi dann d’ote koloni... Mi rodi sa pars mwin la pèr zot i panss arienk dann l’amérik téi fé la salté konmsa. Alé oir sa lété in salté zénéralizé.

Ni koné lésklavaz épi la trète la fini par aboli... Pétète avèk in lésklavaz invizib ni sibi mé ni anparl pa tro souvan mé ni pé mète in nom dsi la figuir, sé lo sistèm kapitalist. Li ossi momandoné li produi anpliss é tazantan i fé bann solde. An parmi bann sold néna lo black friday… In lwintin déssandan la vante bann zésklav an solde… Dir ké nou déssandan zésklav ni tonm dann pano-la.

Mé i paré mon zistoir lé pa vré.I paré sé in fake… mé si dabitide mi yèm la vérité, zordi pou in kou mi préfèr lo fo pars li fé pli vré k’lo vré é sa i korésponn myé avèk lékonomi kapitaliss mondyalizé épi la mantalité bann ramassèr larzan dsi lo do bann popilassion épi si lé fo, pou kossa i apèl sa vantredi noir, pou kossa i abiz dsi bann popilassion, pou kossa i zoué azot toulézan la romanss lo Black Friday pou sèye vann toute la kamlote i rèss an stoke partou dann magazin.

Alé oir in takon d’ le moune, in pé partou dsi la tèr, souvan défoi, i ariv pa a zoinn lé dé boute par l’milyé. Fo pétète mé pli vré k’lo vré assiréman.

A bon antandèr salu !

Justin