Apré lo milyar larzan katédral Paris, la pokor fini fé koz la boush, néna in not zafèr, i toush la Rényon dirék, i fé argongn in takon d’moun isi. E, konm lé parti, li lé pa pou éstop koméla. Zot la konpri, sé lo tragédi réfizyé Sri-Lanka.

Lo Sri-Lanka ? In péi o Sid de l’Ind ék 22 milyon do moun. Sa i koréspon anviron 10 fwa popilasyon Paris, plis 27 fwa sak la Rényon. In péi ravazé par la gèr sivil pandan trant-trantsinkan, ék plis 170 mil mor, mé osi ék in kantité disparisyon i koné pi lo kont, pétèt 150 mil, pétèt minm plis. Lo moun i viv dann la térèr. Pa pli tar so dimansh pasé, plin zour Pak, zésplozyon an pagay la pété, dann légliz, dann zotél, 359 moun lé mor, plis 500 blésé. Morso lo kor té fané partou . In vré karnaz.

Zot i konpran pou koué, in tralé zabitan i vé shapé. Néna inpé la trouv lo filon, dirék la Rényon, in tèr léspwar pou zot, aprè katmil kilomèt d’si in morso bato, présk san manzé, ék in sél langouti, inpé ék ti baba tann. Alor, kosa fo fé ?

Lévré, ék tout problém shomaz, difikilté lozman, la Rényon néna, nou pé pa akéy tout la mizèr lo Sri-Lanka, tout la mizèr la planèt. Zot imazine inpé, si sak sominn bato i défil dan la mèr, inn déryèt lot, ék réfizyé i débark isi par santinn. Ousa nou sava ? Nout linkyétid lé konprénab. Mé sa, sét’in kestyon lé rosor governman Macron. Sét ali rég so problém, avan ki konplik tro.

Mé dann tousa, mézami, mwin lé abazourdi antan, an longér d’zourné, désertin komantèr dann radyo, i donn kékfwa anvi vomi. Néna inpé rézonman i rapél a mwin lo téori, « téritwar rézèrvé », lo pratik in kalité léspès katpat, ki vé pa in not konzénèr, i aprosh lo dominn k’li la marké. Akoz li konsidèr sa konm son byin, la pwin personn dot i dwa v’ni la. Mé, oté, nou lé domoun, nou lé pa zanimo, épisa la Rényon lé pa lo téritwar, lo propryété pérsonn.

Finalman, atravèr so trazédi, mwin néna lo santiman malérèzman, plik i sava, plik nou bli tout valèr. Nou bli ziska ousa nou sort, nou bli, nou lé nout tout isi, désandans zémigré. Sa i fé pans a mwin in shanson, group Sabouk. Anndan la i di : « Dann komansman, lavé ryink in boug ék la natir, zordi néna in flo d’moun i viv la, ryink pou zot fitir. Sakinn son sakinn, la lwa Talion son lavnir ». Epi lo rofrin i azout : « Bli pa ton rasine, ti frèr, rasine la tèr. Bli pa ton rasine, ti sèr, rasine ton koulèr. Nout monmon, té Lafrika, papa koté Kalkita ».
Na pi aryin pou di, oté, aprè, kozman konmsa. Sak la pa ankor konprann, li konpran narpi.

Pol