Mésyé, Médam, La Sosyété koz èk moin sé koz èk in kouyon, mé sé o pyé d’lo mir k’i oi lo bon mason. Mé zami, pé s’fèr zot i domann kosa i lé « boir an prète », sansa pé s’fèr zot i koné si zot lé déza in pé ansien. Zot i rapèl dann tan lontan lo prète té tousèl pou boir lo vin - koméla lé pi konmsa, pars moin la vi l’ot zour banna i partaz. An sosyété, boir an prète lété mal vi. Konm lété mal vi manz tousèl dovann moun - la politèss an promnade sansa dsu shantyé lété d’partaz out ropa épi dir lo dé mo sakré pou amontr ou néna l’édikasyon : « Alon fèr ! » konm in l’invitasyon pou partazé. Si in moun téi viv son tousèl, san partazé, dizon li l’avé poin vré zami, vré kamarad é sak lété riskab arivé kan li mor demoun n’arté in pé rar pou lo finéraye… Romark bien l’éspri d’lo partaz sé in kalité é ou la pa bézoin partaz la boisson solman, ou i pé partaz frui, légime, gouté. Ou i pé partaz galman la konésans. Dizon sa sé in klé pou alé an avan, pou alé pli o, pou alé ansanm. Alé ! Mi kite azot rofléshi la dsi é ni artrouv pli d’van. Sipétadyé.