Mi koné pa si zot i ansouvien kosa lété bandèz ? La kaz téi apèl sa galman baké. Kan nou lété pti, nou téi fé nout toilète lo soir dann baké avèk lo sho. Té i mète galman in boushon géri-vite : sa té bon pou soign boubou. Inn-dé bin, avèk gro sèl tazantan épi lo boubou i disparète. Tanka bandèz, si mi souvin bien Doktèr Raymond Vergès l’avé d’mann bann madam pou fé z’ot toilète la-dan. E sa té in gran progré pou l’ijyène. Zot i konpran pou kosa i di : boir d’lo bandèz, sansa ankor d’lo lavla. I paré demoun téi kroi si i fé boir in garson dolo bandèz ou i gingn trap ali an maryaz... Mi pans sa sé d’la krak mé shakinn i pé kroir sak li vé, é sirtou la famiy i pé dir, si z’ot garson i maryé avèk in fiy, la famiy la fé boir d’lo bandèz donk a trap ali dann pyèz. Alé ! mi lèss azot rofléshi la dsi é ni artrouv pli d’van sipétadyé.