Kosa i lé ranpang ? Koméla avèk marmite shinoi kan i fé kui do ri, i krout pa sansa in pti myète. Lontan kan téi fé kui d’ri dsi do-fé, té i krout souvan dé foi. La krout, sa té i zète pa ! Té i manj dan la min avèk in pé rogaye, mèm avèk in pé dsik konm mon gran-mèr té i fé . Tout fason manz ranpang té pa in sign ékstèryèr dé rishès ! I paré sa té in bon tizane kont lo kour-dvant : té i sifi fé bouy dlo dann marmite épi boir le lo. Mi koné pa tro si téi i koup vréman lo tra-la-la, touléka demoun téi pans sa té fé so l’éfé-la. Pétète lo kor li mèm li té i pran lo desu ! Touléka lé myé ké arien ditou, sirtou pou déstrès in pé.

Kosa zot i anpans ? Arien ditou ? Fé travay z’ot koko ! fé bouy z’ot matyèr griz ! zot va oir ké, rant-rant, ni pé z’ète, tazantan dakor rantre nou.