Mésyé, Médam, la sosyété, zot i koné dann in domi-somenn zé dé zil i doi komansé-sète la mi pé apèl ali in zé réaksyonèr pars si li lété pa, La Frans noré pa mète son poi dann la balans… Pétète san k’è i vé réèlman, pou fé kapote lo total kapital konm èl la fé kan lo zé la éspass La Rényon dsi la késtyonn drapo blé-blan-rouz, dsi la késtyon alon zanfan la patri. Lo mèm koz i donn touzour lo mèm zéfé.
Nou la fine anparl de sa é nou néna lo tan pou anparl ankor dsi sète afèr-la.

An touléka, tout bann délégasyon l’apré prépar azot pou kroiz lo fèr rant frèr. Rant frèr ? Moin la pa sir lo santiman fratèrnèl sar lo santiman lo pli for nou va oir ladan. Pars i di léspor sé in lokazyon ranfors lo gatir d’amityé rant bann pèp, moin lé pa sir sar lo ka so foi isi, konm té pa lo ka néna katran kan bann zé la éspas La Rényon. Zot i pans réèlman bann frèr komor la sort ladan ankor pli fratèrnèl par raport bann frèr maoré, sansa bann frèr morisien, épi bann frèr rényoné épi lé zot bien antandi ? Si oui, ébin moin pèrsonèl mi pans pa konmsa san pour san.

In pti détaye vokabilèr i sort fé tik amoin onzèr la dann télé. L’avé in sékans dsi la dékélégasyon la boks é lo prézantatris la parl la délégasyon boksèr péi. Boksèr péi ? El la pa parl boksèr rényoné pars lété pa marké dsi son pronptèr. El la parl boksèr péi. Kosa i lé sa ? Sépa si noré parl konmsa pou bann boksèr morisien, séséloi épi d’ot ankor. Talèr va parl la délégasyon péi pou nou, pou bann rényoné, alé oir lé zot néna in délégasyon nasyonal : nasyonal ? Sa i rolèv in pé lo bann ga ! Péi, sa i abèss anou in pé mi pans.
Zot va dir amoin pou kosa alé rode lo pou avèk lo lant dann la tète la poin shiové ? Pars sé konmsa mi san lé shoz é pars sé konmsa lo vokabilèr i abiy la réalité. Péi ! Péi ! Kansa v’apèl anou rényoné ? Rényoné sa i va amoin bien sa. Péi ? I va pa moin dann in ka konmsa !

Nb - Goyav de Frans i sharj a kass la bransh. Goyav de frans ? Sindrome goyav de Frans ! Kansa va fini in pé avèk sa.