Zordi samdi. Domin, siplétadyé, sar dimansh. Domin, m’a pans mésyé Fillon, Promyé minis la Frans. Pou kosa m’a pans ali ? Alé oir nana in bonpé z’afèr épi in bonpé d’moun intérésan pou pansé. Mi vé pa dir mésyé Fillon lé pa intérésan, pars pou moin, boug-la, in vré mistèr. Koman in boug, i paré li sé lo shèf gouvèrnman fransé, i pé kontant son tan pou fé bann travay la pa sète in shèf gouvèrnman, la pa non pli sète in sipèr-minis, dizon sète in gran komi l’Éta solman. Arzout èk sa, kan son shèf i anvoy ali an promyé lign, lé pa rar li tronp dsi la sityasion.

Na dé-troi moi, lo pti prézidan la fé vni ali l’androi li té apré pass vakans, pa pou bate in karé an vélo avèk lo shèf, mé pou tash moiyin trouv dis-onz milyar l’éro pou anpèsh la dète l’Éta tro rogoumanté. Té pa dir pou trouvé, vi k’la trap sa in pé dann in sinkantène nish fiskal. Mésyé Fillon la asplik demoun, sa té in bon manyèr pou diminyé la dète, é anpliské sa, in bon manyèr pou la Frans gard son 3xA. La pa pass troi moi, é in dimansh, lo pti prézidan la réini dé-troi minis, mésyé Fillon dann ta, pou artrouv ankor uit milyar l’ero, touzour pou gard lo 3xA, touzour pou anpèsh la dète monte konm délé dsi l’fé. Zédi, mésyé Fillon la fé in diskour pou di sé pou tienbo kont lo mové kroisans l’ékonomi. Té falé oir ali, koman li lété fyèr, koman li lété sir sak li té apré di. Mèm pars pou li, té lo méyèr program z’éléksyon pou l’UMP.

Elas, élas, ménélas, mon kèr lé an filas, ala pa ké l’Erop i trouv moiyin di gouvèrnman fransé, tansyon pangar, pars la kroisans lo PIB sar pa in pou san konm gouvèrnman i kroi, mé zéro virgil sis pour san. Donk nana ankor plis kat milyar l’éro pou trouvé dsi bann nish fiskal ou sinonsa dan la posh bann Fransé. Kat milyar ? Dakor. Mé ala pa ké li la fine di, lo dézyèm plan l’ostérité sar lo dèrnyé avan z’éléksyon. Lo dèrnyé ? Sa i rès a voir, pars bann z’azans notasyon l’apré avèy l’ékonomi la Frans vèy pa koman, épi bann prètèr l’arzan l’apré fé mont lo bann z’intéré malgré lo 3xA.

Dimansh, mésyé Fillon l’apré trap son kalkilatris pou artrouv lo kat milyar, épi dimansh apré, konbien milyar ankor, pars la résésyon i vien, o galo konm shoval. Bon dimansh mésyé Fillon ! Tash moiyin obli anou in pé.

 Justin